Fordómar og
Mismunun
FORDÓMAR OG MISMUNUN
á meðal barna og ungmenna
Á síðustu árum hefur þjóðernishyggja, útlendingaandúð, kynþátta- og menningarfordómar og múslimahatur farið vaxandi og orðið sýnilegri víða um heim. Íslenskt samfélag er ekki undanskilið þeirri þróun. Það birtist meðal annars sem meiðandi og hættuleg orðræða, fordómar, einelti, áreitni, ofbeldi og mismunun og á sér oft stað á skólatíma og/eða í frístunda-, íþrótta- og tómstundastarfi barna og ungmenna sem og á vinnustöðum fullorðinna.
Til þess að hægt sé að koma í veg fyrir atvik sem fela í sér fordóma og mismunun vegna þjóðernisuppruna, kynþáttar og/eða menningar og hægt sé að grípa inn í slíka hegðun og tryggja farsæla úrlausn mála þegar þau koma upp er mikilvægt að þau sem starfa með börnum og ungmennum fái nauðsynlega þekkingu og þjálfun. Það er nauðsynlegt að þau þekki mismunandi birtingarmyndir fordóma og mismununar, geti lesið í vísbendingar um að slíkt eigi sér stað og viti hvernig bregðast eigi við þegar slíkt kemur upp, hvernig hægt sé að sporna gegn því og/eða uppræta menningu sem leyfir slíkt.
Á ÞESSU NÁMSKEIÐI ER MEÐAL ANNARS FJALLAÐ UM:
Á námskeiðinu er fjallað um nokkur mikilvæg hugtök í umræðu um fordóma, mismunun og jaðarsetningu á meðal barna og ungmenna, meiðandi orðræðu og umræðuhefð í umhverfi barna og ungmenna. Fjallað er ítarlega um mismunandi birtingarmyndir kynþáttaníðs og menningarfordóma og hvernig það birtist í skóla, íþrótta- og tómstundastarfi.
Velt er upp þeim alvarlegu afleiðingum sem meiðandi orðræða, öráreitni og fordómar sem beinist að kynþætti, menningu og/eða uppruna getur haft. Rætt er um með hvaða hætti er hægt að sporna gegn hlutdrægni, fordómum og andúð í garð fólks með fjölbreyttan bakgrunn og bregðast við þegar upp koma slík atvik með and-rasískum nálgunum og aðgerðum og kynnt eru verkfæri sem hægt er að innleiða í starfið.
FYRIR HVERJA ER námskeiðið?
Starfsfólk og stjórnendur í skóla og frístundastarfi, íþrótta- og tómstundastarfi og aðra sem starfa með börnum og ungmennum sem og aðra áhugasama. Námskeiðin eru ávallt sérsniðin að hverjum hópi og hægt er að óska eftir sérstökum áherslum, eins og til dæmis skólakerfið, heilbrigðiskerfið eða íþróttaumhverfið.
Á námskeiðinu er ávallt stuðst við nýjustu rannsóknir, kenningar og gagnreyndar aðferðir.
Kynþátta- og menningar-fordómar á vinnustöðum
Samkvæmt erlendum rannsóknum eru kynþátta- og menningarfordómar á vinnustaðnum sú birtingarmynd vinnutengdrar mismununar sem er oftast tilkynnt. Þrátt fyrir fjölbreyttar tilraunir til þess að sporna gegn slíkum fordómum á vinnustöðum er vandinn enn til staðar um allan heim. Það veldur áhyggjum vegna þeirra alvarlegu afleiðinga sem slíkir fordómar hafa á einstaklinginn sem og vinnustaðinn.
Á ÞESSU NÁMSKEIÐI ER MEÐAL ANNARS FJALLAÐ UM:
Á námskeiðinu er fjallað um birtingarmyndir kynþátta- og menningarfordóma á vinnustaðnum og vinnustaðamenningu sem umber fordóma og mismunun. Kynþátta- og menningarfordómar á vinnustaðnum geta verið einstaklingsbundnir auk þess sem þeir geta verið stofnana- og kerfisbundnir og þeir geta verið augljósir sem og lúmskir og til dæmis birst í beinum samskiptum og/eða útilokandi starfsháttum.
Fjallað er um aðgerðir til að takast á við fordóma og mismunun á vinnustaðnum og leiðir til þess að sporna gegn því að slíkt fái að viðgangast og kynnt eru verkfæri sem hægt er að innleiða til þess að vinna gegn útilokandi starfsháttum og stuðla að inngildandi vinnustað.
FYRIR HVERJA ER námskeiðið?
Starfsfólk og stjórnendur á vinnustöðum sem og aðra áhugasama. Námskeiðin eru ávallt sérsniðin að hverjum hópi og hægt er að óska eftir sérstökum áherslum. Hægt er að óska eftir námskeiði á íslensku og ensku.
Á námskeiðinu er ávallt stuðst við nýjustu rannsóknir, kenningar og gagnreyndar aðferðir.