hæ!
Ég heiti Sema Erla Serdaroglu og starfa við kennslu og rannsóknir á Menntavísindasviði Háskóla Íslands. Ég er formaður námsbrautar í tómstunda- og félagsmálafræði. Sérsvið mitt eru forvarnir og inngrip, fjölmenning og inngilding, jaðarsetning og valdefling, einelti, ofbeldi, hatursorðræða og öfgahyggja. Í rannsóknum mínum einblíni ég á ofbeldisfulla öfgahyggju, kynþátta- og menningarfordóma, kvenfyrirlitningu, einelti og forvarnir og inngrip fyrir börn og ungmenni.
UM MIG
Ég er með BA próf í stjórnmálafræði frá Háskóla Íslands, viðbótardiplómu á meistarastigi í samskiptum og forvörnum (með áherslu á eineltisforvarnir), meistarapróf í evrópufræðum og evrópurétti frá Edinborgarháskóla og meistarapróf í tómstunda- og félagsmálafræði frá Háskóla Íslands.
Áður en ég hóf störf við Háskóla Íslands starfaði ég um árabil á vettvangi skóla- og frístundastarfs og síðar íþrótta- og æskulýðsmála þar sem ég sinnti meðal annars fræðslu og forvarnarmálum með áherslu á hagsmuni, öryggi og farsæld barna og ungmenna í skipulögðu íþrótta- og tómstundastarfi. Þar að auki hef ég unnið um árabil við inngrip í samskiptavanda, einelti, fordóma, ofbeldi og aðra óæskilega hegðun á vettvangi skóla- og skipulagðs starfs í frítímanum og setið í fagráðum sem taka á slíkum málum.
Á meðal verkefna sem ég hef tekið þátt í að undanförnu er mótun stefnu stjórnvalda um tómstunda- og félagsstarf barna og ungmenna til ársins 2030, staða ungmennafulltrúa Íslands í norrænu barna- og ungmennanefndinni, þróun á sameiginlegri viðbragðsáætlun fyrir íþrótta- og æskulýðsstarf á Íslandi, þróun og innleiðing á siðareglum, þróun á netnámskeiði í barnavernd fyrir starfsfólk og sjálfboðaliða, þróun á herferð gegn neteinelti á meðal barna og ungmenna, þróun á sértækum tómstundaúrræðum fyrir jaðarsett ungmenni, þróun og innleiðingu á aðgerðaráætlana gegn einelti, fordómum og ofbeldi og þróun á verkfærakistu fyrir inngildandi starf með börnum og ungmennum. Þar að auki tek ég þátt í fjölbreyttum faghópum um málefni barna og ungmenna, jafnt innan lands sem og utan, þróa og kenni námskeið tengd mínu sérsviði og veiti þjálfun og ráðgjöf.
Ég hef lengi verið virk í félagsstarfi og setið í stjórn fjölda félagasamtaka, jafnt innan lands sem og utan og ég hef einnig stofnað nokkur félagasamtök í gegnum tíðina. Ég hef tekið virkan þátt í stjórnmálastarfi og um árabil verið virk í baráttunni fyrir mannréttindum og félagslegu réttlæti. Ég hef á síðustu árum verið leiðandi í baráttunni gegn vaxandi fordómum, útlendingaandúð og hatursorðræðu og ég er stofnandi hjálparsamtaka fyrir hælisleitendur og flóttafólk á Íslandi og hef verið formaður samtakanna frá árinu 2017. Á meðal þess sem ég geri á þeim vettvangi er að berjast fyrir umbótum í málflokknum, vekja athygli á óréttlæti og mismunun, að kalla eftir virðingu fyrir mannréttindum flóttafólks og réttlátri og mannúðlegri móttöku og framkomu við fólk með flóttabakgrunn.
Ég hef unnið til fjölda verðlauna, viðurkenninga og tilnefninga fyrir baráttu mína. Ég var meðal annars valinn Kópavogsbúi ársins 2016, ég hlaut félagshyggjuverðlaun Ungra jafnaðarmanna árið 2017 og við í Solaris hjálparsamtökunum hlutum mannréttindaverðlaun Reykjavíkurborgar árið 2020. Ég var einnig hluti af aðgerðahópi kvenna fyrir Palestínu sem fékk húmanistaverðlaun Siðmenntar 2024.
Nám mitt, starfsreynsla, félagsstörf, mannréttindabarátta og persónuleg upplifun og reynsla af fordómum, mismunun, hatursorðræðu og ofbeldisfullri öfgahyggju rennur saman í allri minni vinnu sem hefur það fyrst og fremst að markmiði að stuðla að farsæld, vellíðan, öryggi og virkri þátttöku allra í íslensku samfélagi.
Ég legg mikla áherslu á gagnreyndar aðferðir, kenningar og nýjar rannsóknir í allri minni vinnu og sæki mér reglulega þekkingu á mínu sérsviði í gegnum námskeið, ráðstefnur, vettvangsheimsóknir og aðrar leiðir erlendis. Nýleg viðfangsefni í slíkri vinnu er alvarlegt ofbeldi á meðal ungs fólks, inngrip í ofbeldisfulla öfgahyggja og forvarnir gegn hryðjuverkum og mannhvelið og kvenfyrirlitning á meðal ungs fólks.
Endilega samband ef þú telur að það sé eitthvað sem ég get gert fyrir þig og þína!
